M小姐我哋今次選擇咗喺仁安醫院生產，而因為開刀嘅關係我係可以揀日子但係我揀嘅日子得返早上7:30嘅時間所以醫院就安排咗我哋早一日入院（仁安醫院唔需要另加一晚收費）
記得即將要入手術室個一個朝早，我一早六點就起左身準備，姑娘幫我著好壓力襪，我就換好手術袍，坐係床邊等，我其實個心真係好忐忑又有小小驚，等左差唔多七點，R先生都嚟到醫院陪我落去手術室，但因為全身麻醉關係，R先生就無得入手術室，佢就係手術室出邊等我。
準備入手術室之前，我訓左係手術準備房，鄭醫生同我講咗幾句然後麻醉師就幫我種痘，我訓係度四圍望，見到好多姑娘醫生行黎行去，我就個心有啲實實地，驚架ma 😂
入到手術室，我不停震，震得好西利，又凍又驚，麻醉師比左d野我聞，我記得叫我深呼吸，之後我深呼吸左六至七下我就已經冇知覺啦。
之後R先生話返俾我聽，其實手術開始咗15-20分鐘左右，BB就已經拎咗出嚟，點解會知？因為我哋嘅兒科醫生出左去搵佢同佢交代個情況，一切都好順利，仲話BB完全冇受麻醉藥影響，一出世就已經大喊。
而我就梗係仲未醒繼續手術緊啦，差唔多一個鐘頭多啲我就聽到有人拍我，話：「起身啦！BB好叻呀！喊得好大聲！」然後個人再拍吓我，我就咁嘅情況之下醒咗。我醒個下，我已經覺得好辛苦，成個喉嚨都好乾，完全係發唔到聲（我諗因為啱啱插完喉有d關係？！），我想唞氣但係又好似好難透氣咁，而我隻眼好想擘大但係好難擘大，再感覺到個傷口好痛。係咁嘅情況下清醒左我諗5分鐘至10分鐘左右，有個姐姐就推我出去手術室，但係推出去之際，我亦都聽到有人話我要聞氧氣，之後就俾咗條管我，仲同我講要另外收錢🤣🤣（即係咁….我嗰一刻點都唔會Say No 㗎，係咪先）。氧氣管都插埋之後就真係要推返去病房啦，推咗出去走廊我隱隱約約就聽到R先生喺我隔離，然後就跟埋上病房。
返到病房R先生幫我執下房嘅嘢，同我講咗幾句佢就要離開……因為疫情關係探病時間得返下午四點至下午八點，所以佢要下晝四點先再嚟……而我就繼續吊緊鹽水（包含止痛藥），瞓喺床度郁唔到，姑娘就定時入黎同我清潔駁住尿喉嘅位置，頭一日就係咁瞓咗係張床度渡過……
到左第二日，朝頭早醫生黎睇我，都知傷口係痛，我都好怕傷口有咩事，醫生講左句野我覺得好安心，佢話：「個傷口縫左就係縫左，唔會爆返開，唔洗驚」醫生走左之後，終於到咗最驚嘅環節，就係要嘗試落地……姑娘一早就黎同我拆左尿喉，姑娘就同我講過兩三個鐘就撳鐘叫佢地同我去尿尿，咁我就再係床訓等急尿落床去厠所……等下等下過左四個鐘，但我完全無尿意😨，但我又怕等得太耐唔好，我就撳鐘叫姑娘，仁安嘅姑娘真係好好，好有耐性，第一次落地佢哋都會扶住，完全唔會俾我覺得我係阻住佢同佢都好願意幫忙，等我慢慢行。慢慢行到去厠所，除褲都要姑娘幫忙，我已經好唔好意思……好喇坐左落去個馬桶度，姑娘就開住個水龍頭，我諗緊佢做咩咁但我無理喇，因為我要專心呵尿……我等左20－30秒左右，終於呵到尿尿喇，原來呵嘅時候個子宮係有小小痛小小唔舒服，但都順暢嘅……呵完之後，我就同姑娘講，姑娘就熄左個水龍頭再幫我沖乾淨尿尿個位置，個一刻我先恍然大悟，姑娘開住個水龍頭係唔想大家聽住我尿尿聲而大家覺得尷尬 ，第一次覺得做病人要人幫忙都咁有尊嚴，真心好感動，個心軟一軟咁……去完之後我就慢慢行返去床到休息，已經覺得好攰好攰……隔左陣我自己都試下自落地企一企行一兩步……係呀係行兩步😅……因為想快啲好但又覺得頂唔順……到咗夜晚我就發覺有啲唔妥，全身痛到流汗，熱得好辛苦，我就叫姑娘俾多一次止痛藥我食，但都搞唔掂，最終半夜係大髀打咗一支止痛針，我先可以叫做訓到冇咁痛……可以訓到第二朝……
到咗第三日，我又嘗試落地啦，情況就好過第二日好多，所以都好努力慢慢嘗試落多啲地，直到去到第四日先至可以行得好少少。無咁痛代表咩呀？！代表食到多少少野囉！！我好鐘意叫菠菜雞肉粥，仁安野食真係好好食😂
第四日朝早開始就行得再好少少，起碼行路條腰都直D先喇 ～ 仲諗正呀，黎緊嚨一晚我應該可能訓得好d喇😌不過開心得唔好咁早，另一個問題就出現啦…………就係石頭胸！我已經家時去餵奶，但因為BB食食量大嘅BB我，佢唔願意埋身食，一放佢埋身佢就個咀唔郁，一拎開就大喊話要飲奶（識玩呀死仔！😤大佬呀，我岩岩上奶，點樣可以俾好多奶你呀……），咁無計喇，我咪餵奶粉。而我只係飲咗一日炒米茶，反應好大，夜晚突然間上奶上得好快，唔掂個胸都會痛，痛到訓唔到，半夜頂唔順走去搵姑娘幫忙…試吓入去餵奶房俾BB啜吓…但都係個個問題，大食BB嫌母乳一滴一滴滴出嚟慢，滿足唔到佢嘅需求，所以佢係完全唔幫忙啜…如是者……我就唯有好失望返返房用手去幫自己通….好在仁安都安排媽媽們上個母乳堂，姑娘教過點樣去餵點樣去通點樣去乳去處理～就咁樣……過埋第四日啦…
到第五日終於可以出院啦，我爸媽同R先生都好似好開心咁，一話俾佢地知我出得院佢地就好快到左 ～ R先生俾好晒錢上黎同我一齊見埋姑娘就去BB房接BB ~ 當日有好多BB出院，好似有22個 😳（可能好多人都趕想新年前返屋企）我地個兒科醫生話BB黃膽都唔超標，所以可以一齊出院，但係始終佢都未過出黃膽高峰期，所以出咗院第二日我哋再返去兒科醫生診所再檢查喇 ～姑娘抱BB出黎，我媽一接個BB就好開心，話好細粒，見到阿媽笑得咁開心，呢D大概應該就係叫婆孫關係吧😉
M小姐
R先生