BB展戰利品 – STOKKE TRIPP TRAPP成長椅

係BB展我地除咗買初生用品之外，都有買BB大少少先會岩用嘅嘢，例如蒸煮機同埋成長椅。因為我地預計將來日子會好忙碌，唔會再得閒到時再去了解同shopping…. 所以決定就不如趁BB展有人講解時買喇! 😣

買之前我地自己有一啲想法，就係唔想不斷去換佢嘅傢私，畢竟BB用嘅嘢係不停因應佢成長階段去換適合佢年齡嘅野，咁我地就索性買貴啲都想起碼用到三五七年!

係成長椅方面，我地揀左STOKKE，佢係北歐品牌歐洲製造，價錢都唔平，但就勝左可以用到好耐，由BB去到大人都坐得， (有7年保養。耐用程度聲稱可以係十年八年, 甚至一世!)，即管睇下用到幾耐!

係BB展完咗一個半星期左右，我地就已經收到送貨通知。😃 (真係要讚吓! 送貨時間可以揀平日6pm-11pm，岩哂啲在職爸媽)

STOKKE既成長椅係有分兩個材質，一種係橡木，另一隻係山毛櫸木。橡木得3隻顏色揀，呢種材質摸落去係會有坑紋比較有質感，本人就覺得手感好好，但價錢就貴幾百蚊港紙；山毛櫸木就有接近10隻顏色可以揀，佢就好滑身，無坑紋嘅觸感，但撞到花左佢就會甩色嘅情況，會見到木本身嘅顏色。其實兩個材質都一樣好堅固耐用，兩款嘅重量都有大約7公斤，真係睇你自己喜好。

點解叫成長椅呢? 其實係因為BB一出世佢已經開始用到。張椅可以根據BB唔同嘅年齡去配返指定配件嚟用，但我地就無買到0-6個月嘅配件(可能我地會直接買張搖搖椅代替，而家就我地大人用住先喇），我地只係買左6個月至3歲用嘅用餐配件，到時侯BB就可以坐住推埋去餐台同我地一齊食飯，想培養佢可以同大家一齊食飯嘅習慣，希望做到喇!