M小姐相隔左一個月，COFFEE又要返去診所啦。今次就係打五合一預防疫苗同埋要抽血， 30日左右後驗血報告就會出，如果個報告係合格就可以正式同澳洲申請入口證同埋預訂之後狗仔落機直接去嘅隔離場啦。
真係要再記錄一下，呢一間Agent同呢間診所合作嘅醫生真係好好好斯文，COFFEE入到去打五合一預防疫苗完全冇反應，姑娘都好好抱住佢，一路安撫佢拍佢俾醫生打針，打完針就要抽血。抽血支針都幾粗，係COFFEE嘅後腳位置抽。其實腳真係冇乜肉，初初我都好擔心一吉落佢度一定尖叫啦…COFFEE咁細膽咁緊張! 點知佢完全冇乜反應只係輕輕力un咗一兩聲😮抽咗5至8秒之後佢縮腳，醫生都抽番啲針出嚟唔會梗硬繼續，而醫生覺得血液都已經足夠唔需要再抽。之後姑娘就幫佢撳住傷口幫佢抹返啲血，成個過程我唔覺得coffee好驚，佢只係好緊張，但係緊張係佢嘅本身性格 ~所以成個過程我都覺得好舒服。
醫生今次再一次同佢檢查身體啦聽吓心跳，撳吓喉嚨氣管，醫生話佢心臟都幾好幾健康，但係COFFEE係有少少氣管下榻，不過唔嚴重既。之後同醫生傾過COFFEE情緒既問題，醫生就咁見佢係診所既情況，醫生都覺得COFFEE都真係係表現出情緒係好緊張，咁我都講比醫生聽佢平時我出門口返工佢咁多年嚟都好緊張，所以醫生都會話可以出發前根據身體狀況去考慮俾啲藥佢食等佢冷靜啲上機。氣管下榻已經有少少風險，如果coffee太緊張氣管就會容易收縮，驚佢可能唞氣會辛苦少少。其實我聽完醫生嘅建議我反而安心咗，起碼係有一種藥物或者真係可以幫到佢等佢冷靜安心瞓覺瞓到去澳洲❤️
R先生
M小姐