幫初生BB申請特區護照

入正題。幫BB申請特區護照就同大人嘅方法係有啲唔同。以下嘅方法係for初生，初生同初生。（重要嘅事講三次，唔好搞錯!）

申請特區護照有三種方法，(1) 郵遞 , (2) 網上申請, (3) 網上預約

因為我揀walk-in申請，其他方法請參照入境處網站。(照計要嘅文件都係一樣，不過建議你睇多次)

所需文件
1) 申請特區護照表格申請特區護照 (ID842N)
2) 副署事項表格 (ID641N)
3) 十一歲以下人士的香港永久性居民身份證申請書 (ROP3)
4) 三張BB証件相 （其中一張用咗係ID641N，其餘兩張係交比入境處)
**因為入境處啲表格有機會update或者死link，所以我唔會share係度。大家問Google大神或者上入境處網頁就會搵到**

做齊以上所需文件，已經夠哂。 有人可能會問點解要申請身份証？ 原因係十一歲以下嘅人去申請特區護照係要連埋身份証一齊申請。到時出入境嘅時候係需要出示依兩樣証件先得。

另外要留意嘅地方，就係副署表格ID641N。係需要搵屋企人或者朋友做第三者見證人去簽。首先你要貼咗張相係表格ID641N上面，然後表格中提到要求見證人係相片同表格之間簽名。記住，記住，記住，個簽名唔好畫花相片面部位置，否則又要簽過。（見證人當日唔需要在場，不過你怕個簽名過唔到關，你都可以帶埋佢去嘅…）

walk-in申請文件係需要BB到場。你可以考慮申請個陣帶埋BB去 或者 拎護照個日帶BB去都得。總之，其中一次比入境處職員見到就得。唔需要兩次都帶佢出去。 我就會建議拎証個陣先去。萬一你申請個陣有乜問題，最多你自己去多次，好過你帶住個BB搞嚟搞去。

因為第一次申請，好似話個時間一般都比較長，可能要兩至三個星期左右先拎得。最好問問職員在準。

最後都要戴返個頭盔先！我依個申請方法係比大家一個參考同易啲去理解點做。大家最好自己上入境處網頁睇一次先去申請，以免中間程序有乜改變而失誤就唔好啦。