澳洲移民局終於出咗體檢信比BB啦！

話說我哋早幾日收到DHA比阿B嘅health examination，二話不說就幫M小姐同阿B約體檢中心啦 (R上年已完成體檢）。帶阿B出街真係要幾手準備，又預佢食奶、換片、換衫之類。當日外母已經陪我哋去，諗住多一個人幫手無咁論盡…

上到去中心，一如概往都係咁Q多人… （中心搵食，話知你中肺炎）。職員話一般都係兩小時內做哂，結果我哋搞咗三粒鐘先走得。點解搞咁耐？ 其實我唔想blame啲職員，我知道今時今日又多人移民做體檢，再加上人手缺乏，之但係等咗兩個鐘比我睇到我哋份文件仲放係counter張檯無郁過就嬲嬲地… 大人等兩三個鐘無問題，但係今時今日嘅疫情帶住個初生B係個咁多人嘅地方等咁耐都唔在講(外母同M小姐已經係後樓梯等），佢已經扭到食咗兩餐奶（我本來仲諗住帶一餐），真係無可能繼績等落去。

結果我同M小姐出聲同職員講，叫佢哋speed up，無可能再等。無幾耐姑娘就嗌M小姐做chest X-ray （上年佢已經抽咗血、驗眼同body checking），chest x-ray 係需要除上身衫企埋去部機度做，過程只係一兩分鐘就完成。

至於初生bb有乜嘢做呢？ 問診（有無長期疾病同先天問題）、度頭圍、磅重同度高，以及簡單嘅body checking（聽心，睇手腳）。

兩個做哂其實都係講緊半個鐘內嘅事，所以唔係做得耐而係等得耐！

最後總算搞掂哂… 盛惠HK$4600 (大人每位 HK$1850，BB每位 HK$900）所以大家如果去做體檢，見到同你一齊排隊嘅人都差唔多做完而你又完全未開始，最好同職員講聲。