M小姐當發現有咗BB嘅時候好快我哋就決定搵返鄭醫生（搵返鄭醫生？係呀，之前流產手術都係鄭醫生幫我嘅，上一胎嘅事有機會再講）鄭醫生有係仁安浸會掛診，而最後我哋都決定喺仁安生今胎。
點解最後會用全身麻醉呢？其中因為腰骨嘅問題，其實一直十年左右我都有腰痛，都試過痛到唔係好行到，入埋急症室，醫生都係話無得醫，只係叫我留意姿勢，再唔係就話我肥叫我減肥，藥都係俾消炎止痛咁就完事。
直至上一年2020年頭，我腰愈嚟愈痛，好記得係R先生生日前一日，我仲懶有心思請半日假走去買禮物，點知買完晒坐係商場扮啱啱放工等R先生嚟之際，我一起身個下發覺完全郁唔到，之後腰係劇痛！！！繼而訓左係地下，動彈不能… 所以就叫左白車送左我去威爾斯，係急證室等見醫生都幾個鐘，終於等到有醫生睇我，個醫生完全無禮貌到唔識尊重人，佢用一支筆′了′起我條legging去睇下我隻腳拎唔拎得起，之後就叫我去照X光，個一下我好唔開心，一個病人郁都郁唔到，仲要有咁嘅對待…… Anyway，俾人推左我去照X光，完左就訓係走廊等。等左唔知幾多個鐘，後先睇我個個醫生走黎搵我，一如既往，梗係話無事喇，仲問我想唔想出院，叫我行俾佢睇下，咁我咪嘗試行囉，我一落地，佢見我企到就叫我出院，幾秒之後就唔見左佢。我咪行去換衫囉，點知行左兩步，我成個人趺左落地下，趴左係地下，當時我仲著緊X光袍，即係話裡面完全無衫喇，我趴左係地下大聲叫話好痛，但竟然無人會即埋黎幫我，係R先生去同姑娘講姑娘先過黎，而過到黎不停問做咩跌倒叫我起身（我起到就唔洗叫你黎喇），當刻我都痛到癲……好喇，終於有幾個人用布將我搬起訓返去床到，咁嘅情況…唔留院都唔得喇！但都係留院係度訓，仍然都係俾消炎止痛藥，五日後叫做行到幾步我就出院喇。係呀，無檢查無支援就咁出院喇，香港醫療係咁架喇, 明就明!
之後我自己就去私家睇骨科照MRI，搵到原來腰骨有兩節軟骨發炎脹左所以掂到神經線，再有少少椎間盤突出，之後就再一連串複診，再揾中醫針灸飲藥，終於三個月左右我可以叫做正常行返基本生活到，所以經歷咗九個月嘅產檢，鄭醫生亦都了解到我腰骨嘅情況，鄭醫生同麻醉師商量之後再同我哋商量，最後今次我哋係會用全身麻醉去生BB出嚟。
不如就等我講吓全身麻醉先啦，初初一聽到我要全身麻醉去生BB，其實就有啲驚，不過醫生都解釋得好詳細，好快我都消除呢一個不安。其實而家科技咁發達全身麻醉都唔係咩特別嘅事，不過要留意全身麻醉嘅麻醉藥係生產嘅時候係有機會麻將醉藥會過咗少少去BB度，令到BB出世一刻可能會有啲眼訓，所以一定會多一個兒科醫生喺產房Stand by ，不過全身麻醉嘅藥係散得好快，BB一從母體出嚟嘅時候，D藥都隨即會散，係完全唔會影響到BB日後所有嘅嘢。
反而對於媽媽可能會辛苦少少，正如後先話麻醉藥一散就散得好快，變咗媽媽一醒咗有一段時間會冇咩麻醉感覺，所以無論傷口或者身體上都會有啲唔舒服同痛嘅感覺，要等一等止痛藥（吊住個包野有加左止痛藥）發揮功效。
都係個句喇，而家科技咁好，又遇上好好嘅醫生，又解釋晒所有風險俾我地知，所以我地最終就聽醫生建議全身麻醉生仔開刀喇😉
M小姐
R先生