M小姐COFFEE第二次抽完血之後，臨出發之前，我哋喺屋企都跟住AGENT俾既時間表幫佢滴頸加食心思蟲藥，而呢一個部份呢我哋就要拍片俾AGENT，AGENT會俾返澳洲嗰邊睇嘅。最最最最後要再去見醫生抽血檢查同埋俾醫生幫佢滴最後一次頸。所有報告如果正常嘅話就可以上機啦！🛫
不過…..見醫生檢查之前其實發生咗啲小插曲，就係澳洲政府發現有動物帶咗牛痺熱呢個病毒入去澳洲，而佢哋懷疑係第三組別嘅國家地方傳入去嘅，而香港正正就係呢一個組別，所以Coffee原定一月既機票取消咗，隔離營亦都取消咗…..而且亦都收到消息可能因為呢個病毒嘅緣故，狗仔需要隔離10日改做30日，當我收到呢個消息嘅時候，坦白講，當時我真係喊咗出嚟，我唔知點算，唔想狗仔受咁多苦，但係透過AGENT嘅幫忙，我記得兩三個禮拜左右，就收到最新UPDATE，我哋爭取返早啲月份嘅機票，所以本身一月機票改左去四月，四月改早d去二月，最終，二月嘅機票落實咗隔離營亦都再一次落實埋！因為澳洲政府已經商討左關於我哋今批送狗仔過嚟嘅時候政策不變，但係之後呢就唔知道啦….
出發前見醫生時，都請醫生開定鎮定藥，到上機當日司機叔叔黎接佢去機場嘅時候，我哋都請屋企人俾咗一粒佢食，其實為求只係佢情緒穩定少少。當日司機叔叔黎接狗仔前，屋企人同COFFEE放埋屎屎尿尿就上車啦！去到機場做一大輪嘅報關先上機，但係知道當中AGENT公司都會有人喺狗仔附近定期都會見到佢，而都會有國泰職員都會陪住我哋狗仔，AGENT都KEEP住同我地聯絡，UPDATE我地直至COFFEE上機！
落機之後就有職員直接帶狗狗去隔離營住10日，所以成個過程我哋都仲未見到COFFEE，其實我係相當擔心，而心裏面都祈求千祈唔好收到任何電話….但喺COFFEE入咗隔離營嘅第三日，我收到隔離營嘅消息話COFFEE病咗，唔肯食嘢，便便有血，我知道之後我又🥲喊咗，因為我覺得狗仔好似好緊張應該好驚咁，之後嗰幾日我都不斷同隔離營嘅職員溝通，睇吓佢嘅情況有無變差或者變好，我哋亦都搵好晒資料如果狗仔情況變差，我哋會叫私人醫生入去幫COFFEE。好感恩，過多兩三日，COFFEE嘅情況穩定返，便便冇血，職員都話俾我哋聽佢肯出龍行吓，所以我地叫便稍為無咁擔心….
到咗接COFFEE出隔離營嘅日子，我哋一早就預備好揸一個鐘頭車去到隔離營接佢！真係好開心，覺得佢真係好叻，見到佢好似心頭大石放低咗一樣，不過其實返到屋企都有一大輪嘅嘢要照顧，希望佢快啲安頓好休息好喇🙂
R先生
M小姐