M小姐到埗之後相信好多人有幾樣嘢係一定會做先，搵樓？！開銀行戶口？！搞DRIVING LICENSE ？！申請MEDICARE ？！
我地到埗兩三日就已經開始睇租盤，咁等我分享吓搵租盤既經歷先，呢度搵租盤同香港好唔同，喺香港我哋求其搵一間地產舖同AGENT講我想睇樓，有啲咩要求，AGENT就會帶你去適合嘅樓盤度睇，但係喺呢就會相反，係呢度租客要比較主動。
首先我哋要上租樓網站去搵你想住邊一個地區，有啲咩要求。三房？四房？一個廁所？ 兩個廁所？ APARTMENT? UNIT ? HOUSE?
當你見到心水租盤，就要望吓佢哋嘅INSPECTION DATE ，INSPECTION DATE 即係話你可以去睇嗰租盤嘅日子，例如佢寫住今個禮拜六朝頭早十點十五分有INSPECTION DATE，如果你可以嘅話就撳APPLY留返簡單名同聯絡電話號碼就得㗎喇，咁到當日你就直接去個一間屋度， AGENT會喺門口等你架喇😆你話俾佢聽你已經報咗名，登記完就入得去睇。
有時你會見到INSPECTION DATE 可能係講緊兩個星期後三個星期後，但係你又好有興趣真係想睇間屋你可以喺SEND EMAIL俾AGENT話你好有興趣，問吓有冇機會早啲睇或者開個PRIVATE INSPECTION 俾你。
如是者，你可能已經申請咗三五間屋會去想睇嘅，咁當你一睇啱個租盤而你都有興趣租的話，你可以臨走之前同AGENT傾吓計，問吓間屋有咩特別啊，問下去商場要幾遠呀，表示你有興趣呀，講下有幾多人住呀等等，一啲無聊嘅嘢都可以問吓，總之比佢記得你，留個好印象。之後返屋企，你就可以SUBMIT APPLICATION 。
如果你想得到呢個租盤嘅機會大啲嘅話你可以做多少少野嘅，因為始終我哋喺外地嚟到澳洲，你未租過樓，所以澳洲唔會有你嘅租務記錄，第二，你亦都未有工作嘅時候即係證明唔到你有收入啦，咁呢個對於佢哋黎講都係一個好大嘅考慮因素租唔租俾你呢？咁所以呢個時候你就要俾佢睇到你有幾大嘅誠意啦。
我覺得首先喺價錢上邊如果你覺得嗰間屋係值嗰個價錢而非常非常非常想得到個租盤，你可以加五蚊十蚊，講緊澳幣呀吓！你可以SUBMIT APPLICATION 時寫俾AGENT聽你願意加多少少，然後你亦都願意比三個月租或者半年租。如果你再想加多少少誠意，你可以話俾佢聽你雖然而家啱啱到埗未有工作，但係你喺香港其實係做緊啲咩職業、CAP你嘅SAVING話俾佢聽你有幾多錢，話比人聽你絕對有能力係租到間屋，同時又話比人聽點解你咁想租呢間屋等等。盡量寫多少少先至去SUBMIT個APPLICATION，咁當人哋去揀租客嘅時候佢見到你好透明地比人睇到你個背景同誠懇嘅理由，我相信揀你嘅機會又會大啲，好感恩，我哋就用咗以上嘅方法一個月內就搵到租盤，而且有幾個可以選擇添。
可能你會覺得搞錯啊，使唔使加錢呀？！好唔抵囉？！冇乜必要囉！但係唔好唔記得你係一個外地人，嚟到人哋嘅地方，其實冇得再計你蝕唔蝕抵唔抵，我覺得首要係你快D SETTLE DOWN ，比一兩年時間自己去適應，先去再搵一個更加適合自己嘅地方。如果你唔行呢一步永遠都計住蝕咗幾多點樣唔抵，除咗唔開心，其實隻身黎到唔係自己生長既地方，會好大壓力唔能夠好快咁SETTLE DOWN 再去適應新嘅環境。
當然呢個只係我自己嘅想法，大家一定要考量自己嘅條件同情緒，諗吓自己嘅計劃， 記住慢慢嚟，唔好急，因為澳洲同香港嘅生活節奏真係完全唔同，你嚟到澳洲你要嘅都未必想係香港嘅生活節奏啦，比三五個月自己去處理去面對新嘅環境新嘅事新嘅人先再搵工作，唔係好過分啫😉
R先生
M小姐