M小姐終於終於揀好左寵物移民公司，亦都開始左第一步啦。點解我話終於呢？！係因為其實先前我哋揀咗一間寵物移民公司，亦都約好晒準備上去嘅當日，R先生再喺網上面搵資料嘅時候，發現果一間好似好多人講都係黑店😨，收到錢就唔係好跟CASE，甚至有機會最後狗狗會上唔到機……所以當日即刻截停咗，無去到見個間公司。
我地當然重新再搵過其他寵物移民公司💻，經過一番搜尋同埋問相熟有關嘅人之後，有兩間都係我哋嘅選擇範圍內，我哋亦都聯絡過兩間公司，一間俾我哋嘅感覺就係老字號，但係答嘅嘢好簡單，一問一答囉～ 而另一間冇老字號咁耐歷史，但係網上面都好多人讚，而我哋同佢地聯絡之後我哋覺得佢哋答嘅嘢都好詳細同埋比較用心，所以我同R先生經過兩星期嘅研究同埋討論，就揀咗而家我哋用緊呢一間公司啦！✔️(老字號平D但最終覺得溝通好重要，所以無揀到老字號，希望無揀錯喇…….)
揀好咗公司，就約上去寵物移民公司詳細傾嚟緊我哋要做嘅嘢，成個過程幫我地既人比我嘅感覺佢哋都係真係好熟悉啲流程，問啲乜嘢佢哋都好清楚咁樣去解答，亦都有例子話到俾我哋聽佢哋會點樣做，差唔多經過一個半小時嘅見面，我哋亦返到屋企沉澱左幾日都決定比訂金啦（因為都唔平💰💰💰，所以必須要沉澱下😅，因為都怕有D咩決定錯）。見面當日其實我哋都未比訂金亦都冇話決定要用佢哋公司幫忙住，但係佢哋已經俾咗個飛機籠我哋叫我哋返屋企比狗仔試吓適應下😉
比完訂金，公司兩個負責我哋CASE嘅同事同我地就開咗一個WhatsApp GROUP，方便日後溝通。好快我哋就約咗佢哋指定嘅寵物診所幫狗狗做第一步嘅嘢 － 就係打晶片🏷同埋打瘋狗症針💉，去澳洲同香港漁農處嘅晶片係唔同架，澳洲用既係國際嘅晶片ISO，所以就算狗狗一早已打晶片都好，都要再打……
約好咗日期時間去診所，當然我係有少少緊張啦，因為始終唔知道診所嘅醫生姑娘係會點樣，但係當我去到診所姑娘好好，都唔會係冇禮貌串串共個啲，我即時都已經安心唔少。
等咗三四個字，叫COFFEE仔個名喇～我抱住COFFEE仔入去，係一個男醫生，醫生好細心係佢打針之前話幫COFFEE CHECK吓身體先，我亦都話俾佢聽前兩日COFFEE仔佢便便嘅時候有鮮血，佢就特別幫COFFEE CHECK肚仔，手勢好溫柔。原來COFFEE仔可能有少少敏感，叫我有啲嘢唔好俾佢食住，又睇下牙仔，發現原來有隻牙崩左😅檢查晒之後，醫生話COFFEE仔身體狀況良好，所以可以打晶片同埋打瘋狗症針啦，醫生都話去澳洲係嚴謹D，意味住黎緊都好多野整～🗓
醫生打嘅時候姑娘會幫手抱住狗仔，知道COFFEE仔好驚，醫生都會摸下狗狗，叫姑娘點抱令佢安穩少少。醫生話打瘋狗症針先，喺pat pat附近嘅位置，支針幼，話呢隻係練習針😂，等佢唔好咁痛同埋咁驚先，COFFEE仔真係無郁無叫無震😉之後第二針就喺背脊度係打，打晶片呢支針粗好多，醫生都有預先同我講，佢打落去都係好溫柔既，COFFEE仔都係叫咗一下就無野。打完之後狗仔都無話好驚同埋震，都真係好出乎意料之外，因為以往去開既診所狗仔一定會震，一入診所就震個隻……但係今次佢真係完全震過，成個過程我都覺得好滿意。離開咗診所之後就見到佢打晶片嗰個位有少少血，我哋都冇特別幫佢清潔，因為打晶片嗰個位醫生都叫唔可以摸唔可以捽。
離開咗診所之後我亦都係WhatsApp group通知咗移民公司，佢哋好好即刻打電話俾我（星期日佢地應該放假都打俾我），交帶叫我唔好同狗仔沖涼起碼七日，又叫我唔好摸狗仔晶片嘅位置，解釋俾我聽晶片會跟着狗仔嘅血液會去推去入去狗仔身體裡面少少，如果我哋摸佢會有機會晶片入唔到喺身體甚至可能會跌返出嚟，佢話有試過咁嘅CASE😳我聽完都好出奇🤨我再同佢講個針位有少少血，佢都會教點處理，所以返到嚟我哋都好小心，比狗仔喺飛機籠裏面休息，大致上第一步就係咁樣啦～📝
M小姐
